最近工作上需要相機影野，所以我拎左屋企部陳年數碼相機黎影，直至今日準備將活動嘅相放落電腦時，先發現原來我用依部相機影左至少3,4年都未放返啲相出黎，於是我就係到回味以前所影嘅相。當我睇睇下時，發現有一段影片竟然過百MB，日子仲要係幾年前，我心諗:『咩片黎?竟然有幾百MB?點解我完全無印象?』
當我播放條片嘅時侯，我心頭一酸，因為片中嘅女仔令我諗起好多野，埋藏係腦入面同佢一齊嘅回憶都一一湧現。
喺幾年前，我人生之中最低潮嘅一年，我認識到佢。佢個樣好得意，皮膚好好，又有身材，對我黎講係一隻優質股黎，而且佢成日係我面前自稱『童顏巨乳』，我都好認同。
佢好鐘意同我玩，幾乎日日都打電話比我，每當我Msn online嘅時侯，佢都會即時轟炸我。我曾經講笑咁同佢講:『你每一日都打黎講廢話，不如你下次屙屎都同我講聲好無?』自此，佢每次屙屎都會打黎通知我。
喺我人生最低潮嘅時侯，無朋友，無校園生活，每一日都行屍走肉，受盡壓力之下咁生存住，而佢都明白我嘅痛苦，不時都打黎安慰我，而我開始經常發佢脾氣，將我生活上嘅不如意發洩喺佢身上，但佢從來都無怨言。
升到大學，好記得O camp個一晚，由於同我當初想像有啲落差，覺得自己同大學嘅人夾唔黎，都唔敢諗黎緊三年大學生活係點，個一晚我心情好低落，腦海只有佢，就打左電話比佢呻，佢個陣仲好得戚咁講:『你終於知道我好呢?哈哈哈!』
入到大學，生日生得早，朋友唔多個，更加唔好講話慶祝生日，本來諗住靜靜地咁過，但佢嗰一晚竟然上左黎我屋企同我慶祝生日，計落佢屋企去我屋企都要個幾粒鐘......佢仲比左一個好大份嘅禮物比我，但我拆左接近十分鐘先將佢由大大份變成細細份，最後原來係營多黎，而且仲送左一份性事用品比我，我拎係手尷尬咁問:『你送啲咁既野比我.....你係咪女仔黎?』
佢笑得好開心咁話:『知你需要呀嘛!哈哈!』
個一晚佢著得好性感，仲跳上我張床睇書，仲問我一陣食啲咩，嗰陣我吞一吞口水，好想講:『我想食左你。』最後我好理性咁話:『去食KFC。』
一路食嘅時侯，佢完全無儀態咁食，左手一隻雞，右手一隻雞，啲汁流哂出黎，嗰刻我先知道，佢對住我可以好放心咁將佢最真嘅一面展現出黎，原來唔只得我係咁。
又記得有一日，佢放左學要我陪佢睇戲，我話我個日著得好柒，又無剃鬚，本來已經柒嘅我顯得更加柒，但佢死都要我出黎，嗰刻我喺到諗，就將我最樣衰嘅一面展露喺佢面前，唔知佢點睇我呢?
出到黎佢完全唔介意，仲不時玩我嘅鬚，我地仲去左玩具反斗城玩埋啲低能野，玩到唔捨得走，最後一齊睇左套三級片『囡囡』，我都係第一次同女仔睇三級片。
後來我地繼續來往，佢放左學會黎我間學校搵我，直至某日，我覺得係時侯要中止依段關係，始終對方係有男朋友，再咁落去，對大家都唔好。雖則佢完全無介意，但我介意，最後對佢不理不睬，即使佢用好多方法去搵我，我都唔理佢。好記得有一晚佢打左一篇好長好長嘅文比我睇，但我已經唔記得左內容講咩，大概話佢好鐘意同我玩。
直至除夕夜，唔知咩事我地又再次聯絡返，隔左幾個月無見，感覺有啲唔同。嗰一晚佢戴住口罩出黎，我問佢咩事，佢笑笑口話:『我剪左個柒頭呀!要遮遮先!』我真係笑左出黎，佢真係一啲都無變。我依啲無朋友嘅人，倒數活動本來無我份，但嗰陣我又唔知點解又好想出黎玩，可能返工返到個人好想透下氣，最後不知不覺咁成日喺佢面前呻，個傻妹竟然推哂當晚所有Party出黎陪我依條毒撚......諗起都慚愧。
嗰一晚佢問我:『點呀? 有冇鐘意嘅人呀?』
我諗左一諗，最後講左個大話:『有呀!』
佢好興奮咁係咁問對方係點，有冇相，好想知對方性格點，最重要正唔正得過佢。其實我都係亂吹，廢事我地之間好唔知點咁。
倒數完，我地去左一個地方拍片，講下啲無聊野，本來都無咩特別，但條片去到最後，我問左一句:『講下新一年有咩大計呀?』
佢好認真咁同我講左一句:『劉啟明!我希望你今年唔好再發我脾氣!我希望你唔好再傷害我弱小心靈!』
我當時係答應左。
如今睇返，我諗我無令你失望，因為我無再發你脾氣，都無傷害過你，因為自從嗰晚之後，我地就再無見面同聯絡。
依一刻心酸，係我失去左一個曾經視我為一個好重要嘅人，真真正正拎個心出黎同我做朋友，一個我唔需要戴住面具去對佢，可以做返自己嘅朋友。
自己曾經講過 " 感情樹係需要每日都去培養，每日都要去用心去打理，如果有一日，或者有一段時間唔去好好打理棵樹，唔去投入感情......咁樹枝就慢慢淡，最後咩顏色都無，成條樹枝都會消失左。"
希望我可以做到。
今晚之後，我唔會再比我身邊一啲重要嘅人離開我，盡我所能維繫住屬於我嘅感情樹。
既不回頭 何必不忘
既然無緣 何須誓言
今日種種 似水無痕
明夕何夕 君已陌路
Search